كلام مهم جدا عشان الفترة القادمة بإذن الله حتكون مختلفة؛
عملي في الفن هو عمل هواة - حتى الآن بشكل كامل - أنا ممثل و مؤلف و سيناريست و مونتير و بانفذ فيلمي الأول حاليا من إخراجي كمان، بالإضافة لبداية عملي الاحترافي على منصات التواصل الاجتماعي و اللي بابدأها بالحديث عما يتعلق بالفن و بعدها حاتكلم في موضوعات مختلفة، بعد ما تكون قاعدة الناس اللي بيتابعوني كبرت بإذن الله. - بابدأ على صغير قبل الترويج عشان لما أبدأه يكون عندي محتوى كافي و جذاب -.
درست كل المجالات دي و غيرها دراسات حرة؛ عن طريق ورش و دورات متخصصة، غير الدراسات الذاتية؛ مش بهدف إني أحترف فيها كلها، لكن بهدف إني أشوف الحاجة اللي أعرف أعملها و اللي حتساعدني في فهم أكبر للمجال، و عشان أقدر أنفذ اللي عايزه من غير ما أستعين بحد قدر الاستطاعة.
مش بادور على حد يديني فرصة و لا حتى عايز فرصة من أي حد في المجال الاحترافي لإن المعروض و المتاح لا يرضيني و لا يشبع الشغف اللي موجود جوايا؛ أنا باحاول أخلق فرصتي بنفسي؛ لإن من خلال اللي شوفته؛ ما فيش حد بيدي فرصة حقيقية لحد إلا لو هو قدر يثبت نفسه، و ده اللي باعمله حاليا؛ مهما حاولت تتواصل و تكلم ناس و تبعت ما حدش حيرد عليك، و لو رد حتكون كلمة مجاملة أو دعاء أو مجرد عرض بسيط مش حيوصلك لحاجة مع الأسف.
هل اللي باعمله و باسعى فيه حينجح ؟ أملي في الله كبير، لكن لو ما عملتش و ما سعيتش؛ عمري ما حاعرف إذا كنت حانجح و أوصل لو عملت و سعيت؛ يعني ببساطة باعمل اللي عليا و باسيب الباقي على ربنا.
أتمنى يا رب إنه يحقق لينا كلنا اللي بنحلم بيه و يخلينا نتحمل الإحباطات و عدم التوفيق؛ كل عرقلة أو حتى غلطة في الطريق باتعلم منها و باستفيد...
دعواتي ليكم و دعواتكم ليا و خلوا أملنا في ربنا أكبر من أي حد...