من واقع معرفتي المتواضعة؛ أحد أسباب خروج نوعية الأفلام المستقلة بالشكل ده؛
اللي بيصنع فيلم من المستقلين أو اللي بيرغبوا يقدموا في مهرجانات و غيرها بيبقوا المخرجين؛ فحتلاقي في معظم الأفلام دي؛ إخراج بيستعرض فيه عضلاته؛ و زوايا تصوير و لقطات ثانوية و إضاءة و غيرها من العوامل الفنية، اللي المشاهد العادي مش بيهتم بيها أصلا؛ لإنه اهتمامه الأكبر بيكون منصب على الأداء التمثيلي، و ده اللي بيبقى مش موجود في الأفلام دي، اللي غالبا بيبقى فيها ممثلين، ليسوا ممثلين أصلا، و صناع الأفلام دي بيبقى فعلا آخر اهتماماتهم هي الممثلين لإنه عايز يعرض الفنيات اللي ذكرتها؛ فهي بتاخد جوايز في المهرجانات المتخصصة، لكنها لا تصلح للعرض الجماهيري، و لو اتعرضت لا تنجح و لا تكون ملفتة.
صناع الأفلام المستقلين محتاجين إنهم يهتموا بالإبداع بكل عناصره، و عنصر القصة و التمثيل أكتر من الفنيات الأخرى؛ فيه أفلام كتير حققت نجاحات مبهرة، و ما كانش فيها استعراض للعضلات في للفنيات، على العكس كل ما كنت بسيط في عرضك؛ كل ما حتوصل للناس أفضل.
 |
| عبد الحليم و سميرة سعيد |
يحضرني هنا موقف حكيته سميرة سعيد لما كانت في بداياتها و غنت أغنية قدام عبد الحليم؛ ففيه جزء قالته بشكل فيه مبالغة في استخدام حليات الصوت؛ فقالها ليه قلتيه بالشكل ده ؟ فردت إنها عايزة تبين إمكانياتها الصوتية؛ فقالها الجزء ده مش محتاج إنك تقوليه كده، لو إديتي شيء زيادة عن اللي هو محتاجه حيطلع غير جيد، عكس ما أنتي متوقعة.
و ده فعلا اللي بيحصل مع الأسف...