خالص احترامي و تقديري للفنانة الكبيرة منى جبر... 😊
بين الوقت و التاني بابحث عن الأعمال القديمة اللي لم أشاهدها زي مسلسلات و أفلام لإني بوجه عام باحب القديم؛ فيه حاجات باكمل مشاهدتها للنهاية و بتعجبني و حاجات تانية مش بتعجبني قوي، و فيه حاجات مش باقدر أكملها لأسباب كتيرة، منها مسلسل عربي اسمه "بلا خطيئة" إنتاج 1980. 🙃
المشكلة في المسلسل ده - و اللي لقيتها على طول أول ما بدأت مشاهدته - إنهم اختاروا الفنانة منى جبر تؤدي شخصية كوثر و هي فتاة انهت الثانوية العامة و خالها قدم لها عشان تلتحق بالكلية... 😒
ما عنديش مشكلة إن فيه ممثل يعمل دور أصغر من عمره لو كان شكله و ملامحه تتواءم مع المرحلة العمرية اللي بيلعبها؛ لإن الممثل بشكله مش بسنه الحقيقي، و فيه ممثلين كتير كانوا بيأدوا أعمار أكبر من أعمارهم؛ زي الأستاذ عبد الوارث عسر اللي عمره ما مثل دور شاب صغير و كان بيطلع أب لممثلين أكبر منه أو في نفس مرحلته العمرية و هو لم يكمل العشرين عاما حتى ! 😟
و فيه ممثلين كانوا بيمثلوا أدوار أصغر من أعمارهم لإن أشكالهم تدل على كده؛ زي الأستاذ عبد الحليم و الأستاذ حسن يوسف و الأستاذ محمود الجندي و غيرهم؛ مثلوا أعمار أصغر و اتصدقوا - و بوجه عام الممثل ينفع يأدي شخصية أصغر من عمره بعشر سنين و أكبر من عمره بعشر سنين لإن الفترة دي غالبا الشكل بتبقى التغيرات فيه طفيفة عند معظم الناس؛ فحيتصدق بدون مجهود -. 😉
المشكلة في المسلسل ده إن أستاذة منى جبر شكلها ما ينفعش يدي خالص إنها طالبة ثانوية عامة و لا حتى كلية؛ عمرها وقت تصوير المسلسل - حسب البحث - كان 42 سنة؛ يعني أكبر من عمر الشخصية اللي بتلعبها بـ 22 سنة على الأقل، و الملابس اللي استخدموها عشان يصغروا شكلها و أداءها مع الأسف اللي كان غير موفق و افتعالي لإنها بتحاول تمثل إنها مراهقة، و ما قدرتش تعيش الحالة. 😣
 |
| منى جبر مسلسل بلا خطيئة |
حد ممكن يسأل و يقول ليه كانوا بيعملوا كده طيب ؟ الإجابة ببساطة إن ما كانش فيه ممثلين على قدر الإجادة الكافية إنهم يعملوا أدوار بطولة و هما في المرحلة العمرية للشخصية، و يقدروا يحفظوا النص و يؤدوا الأدوار المطلوبة باقتدار؛ التمثيل صعب جدا و حفظ النص حتى لو صغير مش سهل و تأديته، و عندي أمثلة على كده؛ هما عارفين نفسهم لما حيقروا الكلام ده... 🤣
بالإضافة طبعا للتسويق و التوزيع؛ اللي لازم يكون الأبطال الرئيسيين معروفين عند الناس، و ده سبب كوارث كتيرة؛ لإن الناس بوجه عام، معظمهم أشكالهم تدي أكبر من أعمارهم، و قليلين جدا اللي كانت أشكالهم تدي أصغر، لكن كان ممكن ده يتحل لو كان أداء الممثل يساعدني على ده و مايبقاش فيه مبالغة في الملابس و غيرها من العوامل اللي بتحاول تقنعني كمشاهد بالعافية إني أصدق إن الشخصية دي صغيرة لسه. 🥲
أنا حاولت أتغاضى عن ده و أكمل مشاهدة، لكني ما قدرتش أستحمل صراحة... 🥺
قولوا لي إيه الأعمال اللي كانت فيها المشكلة دي و ما قدرتوش تقتنعوا بعمر الشخصية و عمر الممثل الحقيقي اللي بيلعبها. 😇