أجرت الجاموسة بكام يا سيد ؟
حكاية منسوبة للرئيس الراحل محمد أنور السادات، لكني مش عارف إذا كانت حقيقية و لا لأ؛ يا ريت لو حد يعرفها يأكدها لي؛ أنا حكيتها لكم بأسلوبي... 😎
اتصل السادات بسيد مرعي - وزير الزراعة وقتها - في وقت متأخر من الليل و قال له:
إيه أخبار مزرعة التسمين في الفيوم اللى وعدتني بيها ؟
رد عليه:
جاهزة يا ريس على الافتتاح.
رد السادات:
بكرة الساعة عشرة الصبح جهز نفسك علشان حاروح افتتحها
و لا يُخفى عليكم طبعا إنه لا كان فيه مزرعة و لا فيه حتى حتة أرض حتى تتعمل عليها و لا كتكوت حتى ! 😅
بعد المكالمة ما خلصت راح سيد مرعي على الفيوم جري علشان يجهز كل حاجة و فعلا ده اللي حصل !
الصبح السادات راح فعلا المزرعة في الفيوم و افتتحها وكان شكلها يفرح؛ كانت عمرانة بكل أنواع العجول و الجاموس و الفراخ و كل حاجة ممكن تتخيلها في مزرعة متكاملة.
بعد ما الزيارة انتهت؛ السادات أخد سيد مرعي على جنب و قاله:
أجرت الجاموسة بكام يا سيد ؟ 🤣
سيد مرعي اتصدم و ارتبك وهو مش عارف الريس عرف إزاي ! 🫨
لكنه رد عليه و قال له:
بعشرة جنيه يا ريس.
السادات رد:
مش شايف إنه كتير عشرة جنيه على 12 ساعة تأجير ؟
سيد مرعي طبعا كان حيتجنن و هو مش عارف السادات اكتشف اللعبة إزاي؛ فسأله:
مين ياريس اللي قال لك إني مأجر الجاموس؟
رد عليه السادات:
يا سيد أنا فلاح ابن فلاح و لما دخلت على الجاموس الزريبة؛ لقيته هايج و مش على بعضه و الحاله دي لما بتحصل؛ يبقى الجاموس في زريبة غير زريبته ! 🤣