من تجربتي حتى الآن في محاولة صنع فيلمي الأول؛ حبيت أكتب لحضراتكم خلاصة لعلها تفيد حد محتاج نصيحة أو مش عارف يقرر يعمل إيه: -
أولا: لا تستعِن بأي شخص غير محل ثقة بالنسبة لك و يكون حد على علاقة وطيدة بيك؛ لإن أي حد تاني حتى لو علاقتك بيه جيدة؛ في وقت من الأوقات حيتخلى عنك و مش حيكمل معاك لإن الموضوع صعب و حتغلط كتير و تاخد وقت طويل و مش حيستحملك غير اللي قريب منك فعلا و حابب لك الخير حتى لو كان الموضوع غير هام بالنسبة له.
ثانيا: لا تصدق أي شخص يقول لك إنه حيعمل لك فيلمك بميزانية بسيطة و معتدلة لإنه حيسرقك مع الأسف و يستغلك أسوأ استغلال و في النهاية، الفيلم حيطلع بشكل سيء لإن همه الأساسي هو الفلوس أو الاستفادة منك؛ هو مش قريبك و لا صاحبك عشان يبقى همه يساعدك إنك تكبر و عملك يبقى الأفضل.
ثالثا: اعمل فيلمك بنفسك بأقل ميزانية ممكنة؛ لا تكتب سيناريو يخليك مضطر إنك تصرف كتير أو تاخد تصاريح صعبة أو تستعين بأشخاص كتير؛ خليه محدود قدر الإمكان عشان تقدر تنفذه لإنك - مع الأسف - مش حتستفيد منه بشيء إلا إذا ربنا أراد.
رابعا: نفذ فيلمك بالإمكانات المتاحة معاك مهما كانت، و خلي رغبتك الأولى إنك تشوف عمل ليك متكامل، و بعدها مش مهم يوصل لكام واحد؛ لإن ده صعب تحقيقه و صعب إن حد يقرر يشوف عمل لشخص هو مش عارفه كويس؛
خامسا: لو نجحت في صناعة فيلم بأقل إمكانيات؛ دي في حد ذاتها خطوة رائعة و حتخليك واثق في نفسك و تقدر تشوف بعدها حتعمل إيه في المشاريع القادمة.
و ربنا يوفقنا جميعا إن شاء الله و دعواتكم ليا؛ زي ما بادعي لكل حد بيسعى و بيحاول مثلي...