رجل المهام المتعددة

 موضوع إني رجل المهام المتعددة One man crew ده على قد ما هو مثير و بيشبع أكيد جوايا الرضا، لكنه في نفس الوقت بيعطلني و بيأخرني في تنفيذ المهام؛

يعني إني بافكر في فكرة الفيديو و بعدها باكتب النص و أعدله و لما أستقر عليه؛ باجهز معدات التصوير من كاميرا و إضاءة و عاكس و مسجل صوت و زوايا التصوير و باصور نفسي بنفسي،

و بعدها باعمل المونتاج اللي بيشمل التقطيع و تركيب الصوت على الفيديو و تعديل الألوان و إضافة المؤثرات البصرية و الصوتية، و اعتماد النسخة النهائية و رفعها و اختيار عنوان مناسب و وضع الكلمات المفتاحية Key Words و و الوسوم Hashtags و كتابة صندوق الوصف و تصميم الصورة المصغرة Thumbnail للفيديو و ضبطها و رفع الفيديو؛

فده اللي مخليني لحد دلوقت مش بانشر بانتظام و أوقات كتير زي الفيديو ده، و اللي شايفين بعض الصور منه - و أخدها من لقطة بعيدة عشان أقدر أغير البعد و القرب و الزوايا في المونتاج - و اللي طلع مش سليم نتيجة إن حصل شيء أفسد الإضاءة فحاعيد تصويره من تاني،

و اللي مش عارف أنفذه من مدة لإن المكان المتاح ليا التصوير فيه حاليا هو صالة المنزل فمش باقدر أصور إلا في أوقات معينة، و بعد كل ده المفترض إني مش بآخد أي نتايج ملموسة و حقيقية و عليا إني أنتظر و أفضل أعمل المجهود ده و أنشر باستمرار؛

طيب إزاي ؟! أنا كل ما باشعر بحماس، بافقده و باحس بملل و زهق و عدم رغبة لإن ما فيش أي دعم حقيقي.