حاشرح في كلامي هنا المعنى اللي قصده الشاعر كامل الشناوي في قصيدة "لستَ قلبي"، بس أولا باوضح إني مش باحب عبد الحليم إلا من عبد الحليم؛ فمش باسمع أغانيه من حد تاني و لا بتهمني محاولات تجسيد شخصيته و لا باتفرج عليها، لكني حارجع للمقصود؛
كلمة "قدر" هنا في الأغنية مش معناها حكم ربنا؛ لإن الكلمة حال كثير من كلمات اللغة العربية ليها معاني كتير، و المقصود بيها في القصيدة ؛ قياس قلبه لحكم حبه.
" و المعنى العام للجزء ده "قدر أحمق الخطا، سحقت هامتي خطاه"؛
فيه إيجاز بالحذف؛ أصل العبارة "قدر قلبي أحمق الخطا"؛ أي إن قلبه كان متسرع في حكمه على حبه؛ فسحق هامته؛ بمعنى إنه ذله، و أعتقد أي حد سمع "لست قلبي" حيتأكد إن ده المعنى المتوائم مع القصيدة لإنه حتى لو افترضنا إن كامل الشناوي عايز يسب قدر ربنا - و العياذ بالله زي ما هو شائع - حيضع ده في موضع يكون متوائم مع المعنى العام للكلام؛ لإن كامل الشناوي شاعر متمكن و قوي من لغته، و عبد الحليم كان قوي برضه في اللغة العربية و فاهم جيدا معاني الكلمات اللي بيقولها و كان بيدقق جدا في اختياراته، و أي تسجل لبروفة من بروفات أغانيه؛ حتلاحظوا إنه كان بيقف ساعات على الحرف مش الكلمة.
و بالمناسبة؛ كلمة قدر برضه بتييجي بمعنى "التضييق" و دي مذكورة في القرآن الكريم؛ {وَأَمَّا إِذَا مَا ابْتَلَاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِ} [الفجر: 16]
هنا حتلاقوا صورة مأخوذة من المعجم الوسيط فيها كافة معاني كلمة "قدر"
#عبد_الحليم #عبد_الحليم_حافظ #عبدالحليم #عبدالحليم_حافظ