المقصود باسم مسلسل أرجوك لا تفهمني بسرعة من بطولة عبد الحليم

 ناس سألوا عن المقصود باسم مسلسل أرجوك لا تفهمني بسرعة من بطولة عبد الحليم و نجلاء فتحي و عادل إمام و ماجدة الخطيب؛ فحاشرحه لإن اسمه فلسفي زي حكايته و المقصود منها؛

الإنسان لما بيكون واقع تحت ضغط و فيه مشكلة في حياته و حتى لو فيه أمل بيسعى له ففي أحيان كتيرة بيكون متسرع في أقواله و أفعاله؛ فممكن يرتكب أخطاء و يعمل تصرفات و يقول حاجات تخليه يخسر الناس اللي بيحبهم و يخسر نفسه في أحيان أخرى، و ده بالضبط اللي حصل مع سامي بطل المسلسل اللي قام بدوره عبد الحليم - اللي كلامي في حقه مجروح نظرا لتأثيره عليا كإنسان و كفنان -؛ هو لما حصلت في حياته أزمة؛ كانت نتيجة إنه كانت عنده أخلاقيات رفض يتنازل عنها و ده قدروا يفهموه عنه بسرعة فوقعه في أزمة، و لما خرج منها اتصرف تصرفات و قال أقوال كانت خاطئة نتيجة الظلم و الضغط اللي اتعرض له فاللي حواليه فهموا تغييرات شخصيته بسرعة و بقوا يتعاملوا معاه على الأساس ده فهو خسر نفسه و خسر قيمه و حياته.

حتى حبيبته ليلى لما فهمت بسرعة إن شخصيته اتغيرت و مستحيل يرجع زي الأول فخسرها، و لما حاول إنه يصلح من نفسه و يسيب كل حاجة وراه و يبدأ من جديد؛ مع الأسف حياته انتهت في حادثة و كانت برضه بسرعة...

التسرع في الحكم على الآخرين مش دايما بيكون حقيقي؛ لإن في أحيان كتيرة تصرفاتهم بتبقى نتيجة ضغوطات و مشاكل تعرضوا ليها؛ فالتأني و محاولة الفهم مطلوبة عشان ما نحكمش على شخص بالضياع و الانتهاء.

يا رب أكون قدرت أوضح لكم معنى اسم المسلسل، و باشكر تاني إذاعة Drama FM - دراما إف إم على تحقيقها لأمنيتي لإن المسلسل ده كنت بادور عليه طول عمري و سعادتي لا توصف حاليا لما حققتم ليا ده...