أكتر حاجة أثبتت لي إن الفن ده شيء صعب في التعامل مع الجمهور موقف حصل لي من شوية؛ فيلمي "صعب المراس" أخدت عليه إشادات من ناس اتفرجوا عليه، بالإضافة لموضوع ترشحه في مهرجان مراكش الدولي للفيلم القصير زي ما أنتم عارفين، و أخدت تعليق إيجابي جدا من د. منى الصبان صاحبة المدرسة العربية للسينما و التليفزيون بعد مشاهدتها للفيلم، و اللي تعاملوا مع د. منى عارفين قد إيه إن هي مش بتجامل حد و بتقول آراءها بكل صراحة، و رأيها أسعدني جدا أكيد لإني قدرت أحصل على إشادة و تقدير منها.
لكني في وسط كل ده ظهر لي نقد سلبي واحد، و معنى سلبي هنا مش إنه قال إن الفيلم لم يعجبه مثلا، لكن كان في الأسلوب و اللي كان من غير أي تفسيرات و بكلام مقتضب و بأسلوب ضايقني؛ لدرجة إنه أثر فيا فعلا تأثير سيء جدا لدرجة إنه قفلني نفسيا و زود الضغط النفسي اللي باعاني منه، على الرغم من كافة الآراء الإيجابية اللي سمعتها و قريتها، بالإضافة طبعا لترشح الفيلم للمشاركة في المسابقة الرسمية لمهرجان دولي؛
ففهمت من هنا مدى صعوبة مقدرة الفنان على تحمل النقد و إن ده محتاج تدريب لوحده عشان تقدر توصله و تتعامل معاه...
من مدة كنت سمعت نقد سلبي على شيء قدمته لكن كان فيه مناقشة و الطرف الآخر كان منفتح جدا و سرد أسبابه و أنا رديت عليها، و بعدها قال لي إنه ما كانش شايف الموضوع بالصورة و لا الكيفية دي، و أعاد المشاهدة مرة أخرى و قال لي إنه رأيه اتغير و بقى إيجابي و سرد لي الأسباب و وصف لي حاجات ما كانتش وصلته قبل كده؛ و ده طبعا فرحني جدا و أسعدني.
و فيه مرة أخرى كنت عرضت نسخة أولية من روايتي الوحيدة على بعض المقربين؛ قريت و سمعت نقد إيجابي من كل اللي قروها فيما عدا شخص واحد، انتقد أسلوب الكتابة في جزئية معينة و قال لي إنه اتلخبط و هو بيقرا و ما عرفش يتابع خط سير الأحداث؛ أنا درست النقد ده كويس و على الرغم من إنه كان النقد السلبي الوحيد، لكني أعدت قراءة الرواية و لقيت إن عنده حق؛ فأعدت كتابة الرواية بالكامل عشان أغير الجزئية دي.
مش بادافع أكيد عن نفسي و لا باقول إني شخص كامل باعرف أتقبل كل شيء أو إني غير متعصب لآرائي و أشيائي الخاصة، لكني عندي شعور و إحساس و لا سيما مع عمل تعبت في صنعه و أخد مني مجهود و وقت و نفذته بالكامل بنفسي بدون وجود أي شخص أو عامل يحفزني...
صحيح ربنا أراد يكافئني على ده بالآراء الإيجابية و الترشيح في المهرجان، لكني إنسان سهل جدا إنه يتأذى نفسيا من أسلوب غير محبب له.