مسرحية محمد صبحي الأخيرة

2 دقيقه قراءه

 مبدئيا، اتفرجت على مسرحية محمد صبحي الأخيرة، و ما عجبتنيش زي مسرحياته الأخيرة - شفت منها 3 مسرحيات و صراحة ما كنتش ناوي أتفرج تاني على أعماله الجديدة -، لكن ده لا ينفي قيمة محمد صبحي و تأثيره في الفن و المجتمع بوجه عام.

هل المسرحية فيها ألفاظ و إيحاءات ؟ أيوه لكن مش بشكل فج زي ما البعض بيحاول يروج، على العكس فيه مسرحيات كتير له نجحت جماهيريا و نقديا و كانت من علامات المسرح العربي و فيها إيحاءات و ألفاظ و مشاهد أكثر جرأة؛ زي مسرحية ماما أمريكا مثلا، فيها مشهد شهير بتاع ليلة الدخلة، و حتى المسرحيات الأقدم زي الجوكر و غيرها، فيها مشاهد و إيحاءات أكثر جرأة بكتير من المسرحية الأخيرة.

أكبر مشكلة بيعاني منها محمد صبحي و غيره من المبدعين كبار السن؛ إنك عشان تعمل عمل فني أنت الشخصية الرئيسية فيه؛ فلازم يكون مكتوب بحرفية عالية، و إحنا عندنا في الفترة الأخيرة مشكلة الورق أو المؤلفات للأعمال الفنية، معظمها فيها عيوب خطيرة، حتى للأعمار الأقل، فما بالكم بالأعمار الأكبر سنا ؟!

السؤال الآخر؛ هل محمد صبحي مازال قادر على التمثيل رغم سنه ؟ أيوه قادر جدا، ما شاء الله حركته على المسرح ما فيهاش أي مشكلة و بيقول النص بشكل احترافي بل عنده مقاطع كتيرة طويلة بيقولها و مش بيتلخبط و لا بينسى، من غير وجود ملقن، لكن المشكلة الرئيسية في الورق زي ما قلت.

لكن فكرة إن محمد صبحي على الرغم من التضييق عليه و عدم وجود جهات إنتاجية، قرر إنه ينتج لنفسه و يعطي مادام مازالت عنده القدرة؛ فأكيد ده شيء يحترم لإني مش مع رأي إن الإنسان لما يوصل لسن معين يتوقف عن السعي و العطاء و يتعكز على اللي حواليه.

أما فكرة الهجوم عليه فهي سخيفة و مفضوحة و فجة، طبيعي إن أي شخص تختلف معاه او حتى لا تحبه؛ أي حد فينا مش بيحب كل المبدعين اللي خلقهم ربنا، حتى لو كانوا أساتذة و كبار من وجهة نظر البعض، و حتى لو كانت أعمالهم الأخيرة سيئة أو أقل من سابقتها،

لكن إنك تستخدم أشياء معينة عشان توظفها على هواك في سبيل تحقيق رغبتك او إرضاء لشخص ما ذي سلطة، و نفس الأشياء دي كان أسوأ منها بيعدي عادي بالنسبة لك، بل و بتعجب بيه كمان؛ فأنت إزاي تقبل ده على نفسك ؟ و هل فعلا بتحترم نفسك دي ؟!

سأكون حُلُماً من أحلامي

قد تُعجبك هذه المشاركات

  • كتير ربنا بيبعد عنك أشخاص و حاجات عشان بيبقى راضي عنك، ممكن ما تعرفش حكمته دلوقت، لكن مع مرور الوقت حتكتشف إن اختيار ربنا هو الأحسن من اختيارك، و إن ساعات اللي حصلك كان من دعاء دعي…
  • توضيحا للبرنامج اللي ظهرت فيه، عشان استفسارات بعض الناس:-* البرنامج المفترض كان يبقى وقت عرضه بالفواصل الإعلانية في حدود ساعة و نص - زي البرنامج اللي ظهرت فيه من أربع سنين - لكن لظ…
  • يمكن مش ده وقتها، لكن باقولها حاليا و بكل ثقة"طز في أي حد"أنا مؤمن بالله ثم نفسي، حتى لو ما وصلتش لأي شيء، إيماني مش حيتزعزع و حافضل أعافر…
  • عندنا في مصر، بقى فيه ارتفاع في نسب الطلاق و ارتفاع في نسب العنوسة و ارتفاع في نسب الرجال غير المتزوجين و ارتفاع نسب البطالة و ارتفاع في أسعار السلع الأساسية و ارتفاع في فواتير الم…
  • صعب جدا إن الإنسان يعترف بفشله في تحقيق اللي بيحلم بيه، خاصة إن ناس كتير اتحدوه و اتخلوه عنه و قالوا إنه مش حينجح، لكن من باب الأمانة، باقول لكل دول إن ربنا نصركم عليا لسبب مش عارف…
  • و لإن الواحد مفلس قبل العيد و ما فيش معاه و لا مليم، و لا عارف أجيب لنفسي لبس و لا جزمة و لا حتى صندوق الشيكولاتة العجيب اللي جواه خروف 😂😂فقلت لنفسي لازم أفرحها و أجيب لها أي حاج…
  • أيا كان مين بيقول الصدق و مين بيقول الحقيقة، استغلال الإنسان و التسلية بمشاعره شيء بينم على انعدام الأخلاق و الضمير و الإنسانيةربنا يأذي و يحرق قلب كل من اتسلى و لعب بمشاعر و عواطف…
  • لما بييجي عيد ميلادي بالاقي معظم الناس بتكتب كلام مجاملة مش بيعبر عن أحاسيس حقيقية، جايز يكون عندهم أحاسيس حقيقية تجاهي، لكنهم بيبخلوا بمشاعرهم أو جايز يكونوا مكسوفين يظهروها مثلا …

إرسال تعليق

حقوق النشر © 2025 شعاع من الماضي جميع الحقوق محفوظة
x